Poslovne vesti - Makedonija

Од април ќе се лета евтино и за Париз, Брисел и за Франкфурт

Бројот на туристите во земјава за првите 6 месеци се зголемил за шест проценти. Според податоците на Државниот завод за статистика, лани има значително подобрување на целокупната туристичка ситуација во Македонија, особено кај бројот на странските туристи, кој во однос на 2012 година се зголемил за 15%.

Министерот за економија, Ваљон Сараќини, за 2014 година најави амбициозна програма за светска промоција на Македонија како туристичка дестинација.

- Ова е досега најамбициозната програма донесена од Владата на РМ. Износот на субвенции за 2014 година изнесува 155 милиони денари, што е речиси двојно повеќе од 2013 година кога беше 75 милиони денари - вели Сараќини и додаде дека ќе биде претставена во повеќе од 15 земји, а ќе се организира и роуд шоу само за туризам, каде што ќе има средби со туроператори, туристички агенции и работници во областа на туризмот.

На средбите, како што објасни министерот, ќе бидат претставени можностите за привлекување туристи и можностите за инвестирање во туристичките развојни зони во Македонија. Сараќини истовремено најави дека од април 2014 година се воведуваат три нови нискобуџетни авиолинии за Париз, Брисел и за Франкфурт.

- Целта ни е учеството на туризмот во бруто-домашниот производ до 2020 година да биде 5 отсто - потенцира Сараќини. Директорот на Агенцијата за промоција и поддршка на туризмот, Кристијан Џамбазовски, информира дека следната недела Македонија ќе биде претставена на саемите за туризам во Утрехт и Виена.